Միջոցառումներ Մշակութային հանդիպում

«Սիրո տող, թե՞ տաղ» . Սևան քաղաքի ԲՈՀԵՄ արվեստանոց-սրճարանում կայացավ հանդիպում գրող, թարգմանիչ, երաժիշտ Էլիզա Մխիթարյանի հետ

Փետրվարի 19-ին Սևան քաղաքում գտնվող հայտնի «Բոհեմ» արվեստանոց-թեյարանում տեղի ունեցավ «Սիրո տող, թե՞ տաղ» խորագիրը կրող հանդիպումը` գրող, երաժիշտ, թարգմանիչ, Երևանյան Էսքիզ գրական/մշակութային հարթակի Հանրության հետ կապերի ղեկավար Էլիզա Մխիթարյանի հետ։

Ներկաներն ընթերցում էին հատվածներ հեղինակի գրքից՝ «ՌոմանտիՂմ»-ից, մեկնաբանում դրանք։ Գրողի և ընթերցողների միջև այս անմիջական հանդիպումը պարբերաբար երաժշտական դադարներով էր ուղեկցվում, որի ժամանակ հնչում էին գրողի հեղինակային երգերը՝ վերջինիս կատարմամբ։

«Իսկապես շատ համահունչ խորագիր էր ընտրված միջոցառման համար,  գրականության և երաժշտության համադրությունը մտքի և սրտի անկեղծ երկխոսության է նման, որը հաջողվեց իրականացնել այս դեպքում իմ և ընթերցողների միջև»,- անկեղծացավ հեղինակը։

Հանդիպման ավարտին հեղինակն իր գիրքը հատուկ մակագրությամբ նվիրեց Բոհեմ արվեստանոց-թեյարանի գրադարանին։

Միջոցառումն ավարտվեց թեյարանի հիմնադիր Գոհար Մնացականյանի խոսքով,  որը ժպտալով եզրափակեց․

«Բոլոր ընթերցողները կարող են վերցնել գիրքը մեզնից և կարդալ, իհարկե միայն հետ վերադարձնելու պայմանով»։

 

 

 

Ընթերցել նաև